無牌賓館猖獗 監管又懶又笨

恭喜發財!祝大家龍年行好運,財源廣進,出入平安!

嗱,農曆新年假期長,香港市民鍾意外遊叉電,外地遊客喜愛來港消費,「出入平安」真係好應景。特別係每年呢個時候,本地無牌賓館必然其門如市,搞到都市炸彈危機四伏,唔驚就假!

大家或者會問,無牌賓館遍地開花,當局唔係講過會加強巡查,嚴厲執法嘅咩?冇錯,港府的確係咁講,仲講到實牙實齒添,但真係得個講字嗰度弊呢!本報發現,牌照處上年接獲有關無牌賓館嘅投訴有近七百宗,比前年飆升九成,但檢控個案不足一成。咁叫加強巡查?咁叫嚴厲執法?吹水唔抹嘴就真!

嗱嗱嗱,港府言而無信, 虛應故事,乃係一貫施政風格,市民或者都見怪不怪咯。之不過有一件事實在令人嘖嘖稱奇,就係就算有無牌賓館斷正罪成,港府從未披露賓館嘅名稱同地址,任由不知情嘅旅客繼續盲舂舂送羊入虎口。港府打壓示威者毫不留情,箝制新聞自由從不手軟,但係對住罔顧公眾安全嘅違法分子心慈手軟,你話係咪奇聞中嘅奇聞吖?

吖,講到港府對無牌賓館庇護有加,差啲漏咗一樣。即係咁,旅客日出夜歸,如果要巡查無牌賓館,最佳時機係咪應該晚上突擊呢?哈,你估牌照局點講呀,佢哋話要尊重住客嘅人權,不宜太夜巡查喎。喂,依家打擊違規行為,況且行動大可只係針對懷疑目標嘅賓館,當局係唔敢做吖,定係懶得開OT呀?

新年流流,太一叮都唔想講唔吉利嘅說話,但係無牌賓館缺乏監管,存在嚴重消防隱患,港府疏於執法就係縱容,姑息放生形同護短,一旦發生事故,搞出人命傷亡,港產官僚就係幫兇,叮!

即係咁,無牌賓館猶如都市炸彈,港府監管不嚴,固之然因為港府嘅懶骨頭基因作祟,執法求其,敷衍塞責;二來咯喎,監管法例戇居過時亦係原因。旅遊業界批評,當局巡查無牌賓館,現時必須由公務員放蛇執法,令部分只接待南亞裔人嘅無牌賓館更加有恃無恐。點解?試問公務員系統入面有幾多南亞裔人,當中又有幾多隸屬牌照處呀?港府成日話巡查人手不足,原來一字記之曰:「笨!」

港府監管又懶又笨,難怪無牌賓館咁猖獗,危機四伏之下真係要祝大家出入平安!

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!