烏煙瘴氣又一年 兔去龍來喚藍天

歲晚收爐，埋單計數，包尾輪到環境局局長邱騰華。呢位仁兄正一「船頭尺」，淨係識度水，成年左騰右騰，動作多多，除咗向市民開刀，添煩添亂，可謂一事無成。

嗱嗱嗱，話口未完又發錢寒嘞！邱騰華出嚟推銷新空氣質素指標，王婆賣瓜，自賣自誇，話加入計算嘅七種污染物全部跟足世衞標準，其中一半更達世衞最高標準喎。自吹自擂已經夠核突，佢仲開天索價，話社會喺贊成環保政策嘅同時，亦要明白須付出代價。係呀，市民要付出代價，但窮到只剩下錢嘅港府又付出乜嘢呢？有彩自己攞，責任市民孭，有冇離譜啲吖，叮！

天下係冇免費午餐，係人都知推動環保需要投入資源，弊在新空氣質素指標根本就係山寨冒牌貨，市民付出真金白銀，卻未必換來清新環境。正如港大學者踢爆，有關指標只係「金玉其外」，以容許額外超標次數蒙混過關，令人非常失望。

查實，港府所謂跟足世衞標準，大部分都係世衞建議過渡期指引中最初級指標，背後仲做咗手腳。譬如，世衞明明規定對二氧化硫同二氧化碳超標「零容忍」，香港居然陽奉陰違，自訂容許超標嘅次數。

簡直不知所謂！舉個例，如果容許守門員喺球賽期間可以隨心所欲，將龍門柱移來移去，叫球證點執法先？新標準等於環境局想點就點，不如自己玩晒佢吖，笨！

講起更新版空氣污染指數標準，真係火都嚟埋。現行標準用咗廿幾年，內容粗疏，指標寬鬆，完全同現實脫節。當局迫於各方壓力，終於肯更新標準，點知新版本同國際標準差一大橛，甚至連內地標準都不如。

就算呢個新指標「衰過孟加拉」，當局一樣係冇承擔。除咗要拖到二○一四年至實施，對因此導致電費同交通費上升，當局話到明「市民有責任共同負擔」，即係推卸責任，要普羅大眾自己孭番。

邱騰華眼高手低，環保動作唔少，爭議更多。購物膠袋要徵稅、回收垃圾要收費，連改善空氣質素成本都完全由市民負擔，總之下下講錢，樣樣掠水，變相徵稅，除咗打市民荷包主意，未做過一齣好戲。

保護環境，改善空氣，政府責無旁貸。邱騰華身為問責局長，唔識環保只識斂財，唔怪得藍天白雲阿崩叫狗，愈叫愈走啦。計太一叮話齋，既然當局一毛不拔，一味諗住無本生利，不如索性摺咗環境局開清潔公司吖，叮！