CULTURE嗡：土炮APP神作家

今次找來一位80後作家孤泣，跟大家分享寫App電子書的看法。

新興多媒體創作─App電子書，日漸受年輕人歡迎，亦成為80後作家另類創作的新途徑，他們還「大玩特玩」，在文字外，更加插圖畫和聲效，令不愛看書的人也看書。香港專業教育學院（屯門）資訊及通訊科技系系主任梁秉雄認為，App電子書的製作成本低、創作空間大，因而成為作家的新寵兒，它更可幫助年輕人建立寫作事業。

孤泣：由細到大，我都好鍾意寫嘢。○八年，我創作咗第一部散文《孤泣情心》。後來，機緣巧合，我喺網上討論區認識一位寫App嘅朋友。當年智能手機開始流行，我自己有睇e-book習慣，又發現身邊朋友好鍾意拎住部電話嚟睇嘢，於是喺二○一○年同朋友合作，推出App電子書。

梁：科技進步改變了人的閱讀習慣。智能手機令年輕人更容易、更方便獲得資訊，因而愈來愈少人願意買書。至於在出版書籍方面，作者面對限制較多，門檻高，發行成本高，令不少有意出書嘅年輕作家卻步。

孤泣：相比傳統書，用App寫書可以發揮更多創意，如喺文字加插圖畫，增強可讀性；每隔幾章就會彈出一條IQ題，或者下集預告框框，吸引讀者追看。香港人最怕悶，咁樣做就可以拉近同讀者嘅距離，增強互動性。另外，好多香港年輕人覺得拎住本書感覺好老土，但拎住部iPhone或者iPad嚟睇書，反而覺得好潮。

梁：App電子書係新興多媒體創作，具備高質素嘅聲音、影像同顏色，呢啲都係傳統書本做唔到嘅嘢。作者可利用天馬行空嘅表達形式，享受更大嘅創作空間，亦可提高趣味性。至於讀者，可自己選取有興趣嘅閱讀題材、安排閱讀次序，有較大自主性，因而令App電子書愈來愈流行。

孤泣：每個App電子書價錢唔高，但能夠接觸到廣泛群眾，有助增加知名度，最重要係可以令更多人睇到。一直以來，我堅持喺小說入面加入不同香港文化元素，例如以旺角西洋菜街、屯門黃金海岸為故事背景，描述香港人去茶樓飲茶嘅習慣等，希望引起讀者共鳴，亦可以捍衞本土創作。

梁：網絡世界無時間、地域限制，因此App電子書較傳統書更能收宣傳之效，這個特點將成為年輕作家嘅優勢。App電子書是未來發展的一個大方向，不但有助擴闊本地創作空間，亦可鼓勵年輕人勇於創作，發展寫作事業。