政壇：何倍倩豪煮五位數團年飯

農曆新年嘅重頭戲，係今晚嘅團年飯，恒生新抱何倍倩亦同唔少主婦一樣，今晚會親手炮製團年飯，早前佢更親自到參茸店掃參茸、海味、罐頭鮑魚、燕窩，佢仲睇中價值二萬元一両嘅冬蟲草，最終埋單超過五位數，今晚餐飯真係好豐富噃！

除咗團年飯，佢仲要封定利是過年，仲因應往年嘅烏龍經驗，今年一於封多啲：「我每年由年初一派到年初八，見人就派，但年年都預錯數，派到初四又要再包過，所以今年會預多啲，預咗包六位數利是。」