政壇：嫻姐鐵頭仁流年不利

龍年立春八字對來年運程有一定啟示作用，我哋搵來香港術數家協會術數師楊子東，利用相關人士嘅出生八字中嘅年、月、日三柱，批算吓部分可能出戰超級區議會議席成員嘅運數。工聯會副會長陳婉嫻被譽為票后，今年運程卻似乎麻麻，楊師傅坦言，嫻姐龍年「流年不利，凡事不順」：「雖然唔知嫻姐出生時辰，唔可以好準確計到，只不過雖不中亦不遠矣。」仲話佢立秋後運程最差。

至於同屬建制陣營嘅建仔劉江華，楊師傅就贈咗佢八個字：「渾水摸魚，仍可順利」。楊師傅唔肯解釋點樣渾水摸魚法。白鴿黨主席何俊仁（鐵頭仁）嘅運程同樣不佳，楊師傅話佢龍年「流年不利，春冬較差」，即係話年頭年尾鐵頭仁嘅運勢都麻麻哋，意味無論選特首或選立法會都遇阻滯。楊師傅補充，六十歲嘅鐵頭仁，八字好旺，但就因為太旺，出現物極必反嘅現象，快則正月已經有可能出問題。

至於社民連，盛傳會接任黨主席嘅「長毛」梁國雄，龍年運勢就唔錯，楊師傅話佢今年「流年有利，仍可牙擦」。