政壇：唐唐兜路行激親建仔
特首參選人梁振英（CY）同唐英年（唐唐）不時隔空鬥法，CY早前使出奇招「路過」民建聯嘅活動，贏晒宣傳。唐唐尋日亦疑似抄橋，下午連同一家大細「路過」建仔嘅黃大仙年宵攤檔爭取支持。不過，唐唐到場後竟然冇第一時間同建仔打招呼，該黨多名地區人士似被激親，事後有人仲心中有氣，質疑唐唐點解「路過」都唔可以光明正大探望佢哋喎？
唐唐行到最後先至到達建仔嘅攤檔，並參與檔內嘅攞糖遊戲，有建仔人士話：「好似攞選委票咁就得o架喇！」不過，出到咁激勵嘅招數，唐唐嘅表現都係麻麻，攞得好少糖！
自從梁唐開跑以來，便被以豬、狼形容。唐唐長子唐嘉盛回應爸爸被形容為豬時話，唐唐喺佢心目中係好爸爸，又話豬唔係蠢嘅，因為《動物農莊》嘅豬係最聰明嘅。
唐英年一家大細去行黃大仙年宵市場。
梁振英夫婦行年宵攤檔，仲買咗「量鷹」文件夾。