政壇:龍年再戰政圈

送兔迎龍,政圈都吹起和風。無論係忙於競逐特首嘅人,定係為九月立法會選舉部署嘅政黨政團,都趁過年期間難得嘅幾日假期抖一抖,特首參選人梁振英假期中掛起休戰牌,話會同太太飛去英國同仔女敍天倫;經濟動力嘅梁君彥同林健鋒亦各有各飛,一個去杜拜打高爾夫球,一個去泰國過個暖笠笠嘅春節,一於抖足精神龍年再戰。

CY尋晚飛英國

龍年政圈特別多大事,三月有特首選舉、九月有立法會選舉,選舉之外,六、七月間嘅政府換屆更會牽動整個政局,所以,政府同政黨人士都預咗今年會忙到飛起,新春假期亦成了唯一嘅叉電期。梁君彥尋晚同家人啟程飛去中東杜拜玩一個禮拜,主要係打高爾夫球,佢話貪當地天氣好喎。至於林健鋒今日就會同太太及囝囝去泰國曼谷玩五日,享受陽光與海灘,過一個熱辣辣嘅新春。

忙緊選戰嘅梁振英尋晚已經同太太飛咗去英國,話要過去同喺當地嘅仔女團聚過年。不過,CY年初二就會飛返嚟,即係話,短短四日間要坐近三十個鐘頭飛機,佢嘅休戰旅程都唔易捱。尋日佢都去咗灣仔出席兔年最後一場政綱諮詢會,下午再拖埋太太唐青儀逛維園花市,使咗一千一百廿一蚊,包括買咗以「神獸卡」為藍本嘅「量鷹」文件夾,離開維園前,CY仲喺籃球場執起個籃球跳射,可惜個波中框彈出。CY嘅孻女梁頌昕早前接受本港媒體訪問時話,聽到有人用狼嚟形容爸爸時感到驚訝,因為問心根本唔覺,CY嘅長子梁傳昕亦話爸爸係能幹同做嘢嘅人,畀人冷漠嘅外表只係反映佢認真喎。

「Money18免費即秒股票報價網站」現推出8升級功能,財經資訊,實時實發!

設計圖片及對白