大仙指點迷津 龍年翻江倒海

農曆新年話咁快就到，來年係祥龍獻瑞保平安，定係水龍翻江攪風雨？本報記者按照傳統習俗，就新一年香港運程求黃大仙指點迷津，結果整體運程及經濟、公共衞生等方面雖然求得中籤，有凶有吉，有危有機，可惜政治方面就求得一支下下籤，預示龍年本港政局動盪不安，凶多吉少。

黃大仙靈籤係咁講嘅：「只因直諫怒天顏，晝夜難離在馬鞍。主僕奔忙神亦倦，更加雪重擁南（藍）關。」典故係「韓文公被貶」，講述唐代大文豪韓愈上書諫迎佛骨，被唐憲宗貶謫去廣東潮州，一路坎坷悽慘，艱難險阻。黃大仙賜予呢支靈籤，正正係今時今日香港政治寫照。大家都知道，今年係特首及立法會選舉年，政治爭拗不斷，社會動盪不安，真係「更加雪重擁藍關」。

更弊嘅係，煲呔曾政府進入倒數，未來幾個月只會無所作為繼續Hea，唔添煩添亂已經偷笑。本港深層次矛盾不斷惡化，民怨累積，吵吵鬧鬧，永無寧日，就好似韓愈當年晝夜兼程咁，人倦偏逢大雪，舉步維艱。所以話，黃大仙靈籤絕對冇講錯。

經濟方面運程又點？今次求到「李白和番書」，典故出自當年番邦遣使長安，諸多索求，朝中竟冇人可以同特使溝通，多得李白寫和番書嚇退對方。雖然係中籤，但寓意來年無大機會，最緊要「不宜忘形，堅守崗位」。

講真，歐債危機陰霾不散，經濟前景極不明朗，金融市場危機四伏，港府唔識變通，貪逸苟安，一味等運到，真係危危乎。試諗吓，萬一外圍環境急劇惡化，金融危機爆發，港府束手無策，就算李白翻生，都幾難打救香港。

同樣求到中籤嘅係公共衞生，典故係大家熟悉嘅「莊子夢蝶」。莊子夢中化為蝴蝶，逍遙自在，夢醒之後連自己同蝴蝶都分唔清。嗱，食衞局局長周一嶽等衞生官僚渾渾噩噩，胡混度日，做官好似發夢咁，呢支籤咪講中晒咯。咪話太一叮唔提醒吖，禽流感陰影揮之不去，黑心食品氾濫成災，如果當局繼續「高床軟枕」發白日夢，搞到香港大禍臨頭，佢哋實走唔甩o架。

總而言之，龍年係吉係凶，一切事在人為。正所謂，人在做，天在看，黃大仙已經為港人指點迷津，依家就要睇港府點做喇，千祈唔好再行差踏錯吖，叮！