政壇：黃成智講英文聽死人

白鴿黨立法會議員黃成智前日聲稱喺旺角過馬路時畀人踢咗一腳，之後大鑼大鼓召開記者會話事件好明顯係有人存心攻擊，又話唔排除同人民力量有關。但佢嘅言論隨即畀人民力量回敬話唔排除白鴿黨作大，而佢喺記者會期間以英文回應嘅片段，就喺facebook被網民寸爆，大彈佢啲英文仲衰過小學雞。

有網民話，成智啲英文不但衰過之前講「搓our breast」嘅克勤仔，仲話成智啲英文認真聽死人，睇嚟需要請個翻譯幫吓手。我哋睇番段片，發現佢講到斷橛禾蟲咁，除咗講唔到人民力量嘅英文名外，就連「黃毓民」嘅英文名都唔係好識，淨係求其講番中文諧音算數。

另外，聲稱喺台灣國民黨總部被黃毓民打嘅白鴿黨中常委馮煒光，尋日去咗立法會申訴部投訴毓民，佢向立法會秘書處提供咗兩段錄影片段，又話現場有好多人可以證明毓民有郁手，要求立法會按程序跟進，仲話要約見毓民等人添。有人民力量成員尋日喺facebook轉貼咗一幅相片，要求大家杯葛《蘋果日報》亂報。