政壇：搞搞政：何鍾泰英姐 毒氣室搏殺
本報早喺上禮拜六揭發添馬艦新立法會大樓室內空氣有毒，總揮發性有機化合物（TVOC）水平一度嚴重超標十七倍，隨時令一眾男議員絕後、女議員生乳癌。經過多日嘅換氣行動，尋日新大樓大部分樓層嘅毒氣水平已符合標準，唯獨七樓仍然超標。
喺新大樓七樓辦公嘅議員，包括兩大立會懶蟲金融界李國寶同體育界霍震霆，佢哋連大會都經常遲到早退，甚至唔出席，何況返議辦做嘢呢？相信毒氣都毒唔到佢哋。不過，喺同樓層工作嘅四名專業會議議員中，以何鍾泰出晒名係工作狂，成日喺立法會做通宵，仲有好勤力嘅勞聯議員「英姐」李鳳英，受毒氣危害嘅風險最大，睇怕要考慮戴番個防毒面具返工。
有議員估計，七樓毒氣水平超標，主因係呢層樓嘅議辦最遲入伙，有關裝修同執漏工程亦較遲進行，相信換多幾日氣就會達標。
設計圖片