衣食住行多陷阱 港人北上不勝防

挨年近晚，港版「春運」高峰期又到，口岸例牌逼爆。正所謂，小心駛得萬年船，出門在外萬事以安為先，尤其係返內地，衣食住行樣樣都要打醒十二分精神，否則隨時中招，輕者破財，重者送命。

太一叮唔係靠嚇o架。嗱，民以食為天，先講食呢瓣。每逢農曆年尾，結伴北上辦年貨係唔少家庭主婦嘅例牌節目，但好多人諗都諗唔到，血拚嘅結果係好可能誤購各式各樣嘅黑心食品。

廣東省工商局最新食品質量檢測報告踢爆，佛山、中山、東莞等等港人經常去嘅地方，市面部分臘肉、臘腸嘅酸價同含鉛量唔合格。仲有吖，有冰糖被驗出二氧化硫含量超標三倍，賀年糖果嘅菌落總數更加超標五倍，樣樣都有毒，問你怕未。

黑心食品氾濫成災，港人北上辦年貨，簡直防不勝防，破財仲係事小，將問題食品帶返香港事大吖，叮！

查實，威脅人身安全嘅除咗黑心食品，仲有奪命白牌車。港人返內地旅行又好，探親又好，好多人會包架長途的士，之不過，如果一個唔小心，跳上的士變咗跳落陷阱，分分鐘畀人賣豬仔，目的地去唔到，隨時去咗另一個世界。

呢嗱，位處珠三角中心點嘅東莞虎門鎮，原來有個遠近聞名嘅「豬仔轉賣站」。本報記者喺當地渡輪路口一帶直擊發現，有深圳的士司機竟然將乘客當豬仔咁，賤賣畀喺度等客嘅白牌車。

叮！千祈咪以為有車坐就萬事大吉，白牌車除咗冇經營牌照，乘客安全更加毫無保障，有起事嚟都唔知搵乜誰追究。咁都未算可怕，最得人驚嘅係，司機為咗賺到盡，經常要求乘客同三唔識七嘅陌生人一齊坐。你話嘞，大吉利是撞正車匪路霸搵食，被洗劫一空事小，萬一歹徒謀完財仲要害命，咁就該煨咯！

唉，就算冇畀黑心食品攞命，一路平安無風無險，過關回港前都可能出事。呢，記得上個月羅湖口岸巴士站導致三名港人慘死嘅奪命車禍嗎？總之都係嗰句，衣食住行陷阱處處，大家都係謹慎啲好。

小心翼翼北上，平平安安回港。佳節臨近，人潮再現，計太一叮話齋，港人最緊要保持警覺，提高防範意識，如果搞到乘興而去，敗興而返，咁就無謂咯，叮！