政壇：台灣魅力騷融合傳統時尚
尋日會展有場「台北魅力時尚展演」，騷盡台灣十二個時尚品牌嘅精心設計，喺場內撞到港澳台灣同鄉會新任會長賴李承美，見佢逐個攤位去尋寶，期間被色彩繽紛嘅靚衫深深吸引，原來係台灣知名設計師高勝忠（Andre）自家品牌。設計師係排灣族原住民，最擅長將原住民獨有嘅圖騰融入設計，加上剪接手法將鮮艷嘅色塊拼湊成幾何圖形，難怪咁引人注目。
同場仲有帶隊參展嘅台灣紡織業拓展會秘書長黃偉基、台北貿易中心總經理劉錫威同香港貿易發展局副總裁周啟良等，眾人對華麗同新潮兼備嘅台灣設計師作品睇到入晒神。
賴李承美（左）被展示原住民文化嘅「Andre」出品深深吸引。
男士們都嚟睇騷打氣，左起為周啟良、黃偉基同劉錫威。