政壇：長毛電腦Game寸唐唐醉酒
為籌更多經費，以窮出晒名嘅社民連，今年喺年宵攤檔出售嘅貨品就搞吓新意思，佢哋設計咗「長毛憤怒了」同「酒後施政害己害人」兩款電腦遊戲，第一款同手機遊戲「憤怒鳥」相似，玩家操控遊戲中嘅「長毛」梁國雄，向煲呔曾、政務司司長林公公、鬍鬚曾、運輸及房屋局局長鄭汝樺等人掟雞蛋，以打倒佢哋為目標。
至於第二款遊戲仲過癮，事關係寸爆特首參選人唐唐，玩家要操控唐唐避開長毛嘅監視去偷紅酒飲，如果中途畀長毛睇到，就會畀佢掟雞蛋，如果成功飲滿「醉酒指數」，就會有句「你是個很會享受的高官」字樣稱讚。另外，年宵亦有檔主借用唐唐個樣推銷紅酒咕𠱸，可惜銷情麻麻，證明唐唐要畀人惡搞至夠吸引。
呢款「酒後施政害己害人」遊戲，寸爆唐唐。