政壇：黃成智被踢又關毓民事？

白鴿黨中常委馮煒光上禮拜去台灣睇總統大選，聲稱喺國民黨總部畀人民力量立法會議員黃毓民襲擊，呢場鬧劇尋日又有新情節。馮煒光尋日喺facebook發表道歉聲明，主動澄清早前話毓民因為個仔而唔敢激嬲中共件事其實係冇根冇據，仲公開向毓民道歉並撤回言論，但佢今日都會按照計劃，去立法會申訴部投訴黃毓民。

疑似暴力事件一波未平一波又起，白鴿黨立法會議員黃成智尋日下晝喺旺角過馬路時畀一個男人喺佢小腿嘅上五吋下五吋部位踢咗一腳，佢跟住就報警同去廣華醫院驗傷，傷口長五厘米。佢大鑼大鼓開記者會，話今次好明顯係有人存心攻擊，又話唔排除同白鴿黨成員同人民力量成員發生衝突，繼而發生網上駡戰有關。佢之所以有立法會唔開去咗旺角，係要幫個仔交電話費喎。

對於人民力量有片段證明白鴿黨中常委甄永樂喺扶手電梯上伸腳踢人民力量嘅義工，黃成智尋日終於承認確有此事，仲話甄已親口承認。佢又引述甄嘅解釋，話因前面嘅人阻住佢拍攝事發經過，所以至會用腳踢人。不過，黃成智講明不能接受甄嘅行為。

毓民唔回應事件，人民力量主席劉嘉鴻就話，如果黃成智話唔排除襲擊事件同人民力量有關嘅話，佢哋都唔排除件事係白鴿黨自己誇大，目的係要冤枉人民力量。佢又話甄永樂承認踢人就應該道歉，又批評白鴿黨所作所為係暴力文化嘅延續。