政壇：鬍鬚曾自大唔吼

鬍鬚曾上場做財爺後，年年計錯數，相信今年都唔例外，事關包括香港會計師公會同畢馬威中國會計師事務所在內嘅幾間大會計師樓同會計師專業團體，都異口同聲預測夕陽政府今年度會有四百幾億至五百幾億元盈餘，相比鬍鬚曾計出嚟嘅八十五億元赤字，來回足足差咗五百幾億至近六百億。

放風唔會有大動作

幾間會計師樓同會計師專業團體近期各自提出佢哋嘅建議，大多係退稅、退差餉、補貼電費、延長供樓利息免稅，再唔係就生果金同綜援出雙糧、扶助中小企等等，冇乜驚喜。但正如富貴黨主席劉健儀同白鴿黨副主席劉慧卿前排喺電台所言，每年預算案諮詢期間，各大小政黨冇畀過意見鬍鬚曾咩？只係鬍鬚曾一時就唔聽人講，一時就聽啲唔聽啲，無喇喇又亂推嘢，結果搞出個大頭佛，令到天怒人怨，香港唔和諧，鬍鬚曾真係責無旁貸。

好似舊年咁，鬍鬚曾就自把自為，硬要注資六千蚊落市民嘅強積金戶口，搞到各黨派冇法子唔槍口一致鬧爆佢，卒之咪又跪低派錢囉，仲畀人狂轟佢亂派添！

咁多黨派同會計師畀錦囊鬍鬚曾，衰啲講句，每度抄一條橋，落得個皆大歡喜有乜唔好呢？有起乜嘢事上嚟賴番人哋轉頭又得，有功勞就話自己開明同廣納民意亦得，得咗！不過，佢識咁諗嘅話，使乜要等到今時今日呢？好似早前有消息吹出嚟，話下個月公布嘅係特區政府換屆前最後一份預算案，所以唔會有乜大動作，咁咪即係叫市民睇住佢再示範點樣激起民憤囉！