摯友張崇基讚人緣極佳

【本報訊】「好唔開心，好難接受！」認識許中信十多年的歌手張崇基，對好友兼滑水學校拍檔遇車禍逝世深感難過。他讚揚許中信充滿熱情，感染力強，對香港滑水界有很大貢獻。

「佢唔鍾意揸快車」

張崇基早在十多年前玩滑水時認識許中信，其後彼此成為香港滑水代表隊隊員，昨日凌晨五時許，張崇基接獲許中信遇車禍的消息，立即趕去醫院，「不過Johnson已經走咗，真係好震驚，佢未結婚，佢媽咪好傷心。」

對於許不幸離世，會否影響滑水學校運作，張無奈地表示，目前最重要是照顧許母，並要協助辦理身後事。他又透露：「我最後一次見佢係上個禮拜，佢唔係特別好酒，平時坐佢車，佢都唔係好鍾意揸快車。」張崇基又稱讚許人緣好，「Johnson出事之後，有好多人去醫院睇佢，你就可以睇到佢人緣極佳。」

同樣愛好滑水，亦是許中信好友的王合喜表示，對事件感到震驚，「我過去經常同佢滑水！」他指出，許熱愛滑水之餘，推廣滑水運動亦十分落力，未聞他有飲酒的習慣。