毒海膽攻港 民以食為憂

民以食為天，新年到，食指郁，人人有口福。不過咁，記住食以安為先吖，事關有毒食品氾濫成災，無處不在，一個唔小心，挨年近晚中招，咁就該煨咯。

嗱嗱嗱，話口未完警報又響嘞。深圳啱啱搗破兩個地下工場，無良商家低價入口來歷不明嘅劣質海膽，用對人體有害嘅工業明礬加工之後銷售，部分有毒海膽原來早就經不法渠道銷往本港。黑心工場衞生惡劣，浸海膽嘅水又黑又臭，孳生大量大腸桿菌，唔止攞膽，直頭係攞命！

日式食品喺香港大行其道，味道鮮美嘅海膽有「黃色鑽石」之稱，更加係好多食客嘅必選心水。係人都知，海膽通常生食，惡菌長驅直入，防不勝防，當局仲唔盡快堵截毒海膽入口渠道，後果不堪設想。

講開問題食品，其實香港防線早就被攻陷喇。食物安全中心早排抽驗咗市面數百個賀年食品樣本，其中一個生曬螺片樣本竟然驗出防腐劑二氧化硫超標一百四十一倍，而竹笙同糖冬瓜樣本亦發現嚴重超標。用咁嘅食品賀年，認真大吉利是！

所以話，五十步唔好笑一百步，內地有毒食品夠可怕，本地食品同樣得人驚。有大型連鎖飲食集團出品嘅蘿蔔糕樣本，被驗出可引致上吐下瀉嘅桿菌超標近二百八十倍。早排黃大仙亦有店舖被踢爆不但無牌售賣冰鮮肉同家禽，所賣豬肉更含有禁用嘅防腐劑添。

叮！當局把關不嚴，本港食品安全面對內憂外患，簡直四面楚歌。相信市民仲記得，舊年台灣塑化劑風波搞到全港風聲鶴唳，更加唔會忘記日本大地震引發嘅輻射危機，令港人聞核色變。最恐怖嘅係，內地作為本港食品最大來源地，黑心食品不絕於耳，淨係最近兩個禮拜，已經先後有黃曲霉毒素牛奶、甲醛鴨血、明礬橡皮雞蛋等被揭發。中港僅一河之隔，每次有毒食品兵臨城下，上至食衞局，下至食環署及食安中心，次次渾渾噩噩，後知後覺，你話港人唔擔憂就假。

正所謂，政府靠得住，豬乸會上樹。連新政府總部及立法會大樓都畀惡菌及毒氣搞到雞毛鴨血，旨意呢班官僚為食品安全把好關，不如求車公元帥保佑好過，叮！