政壇：煲呔曾講「祭旗」黑社會上身

仲有五個半月執包袱嘅煲呔曾，前日喺添馬艦新政府總部擺入伙酒時，攞剛病愈嘅教育局局長孫公孫明揚嚟講笑，涼薄地話染咗退伍軍人症嘅孫公做咗「祭旗」嘅人，佢仲語氣輕佻嘅懶幽默卻鬧出軒然大波，事關次文化堂社長彭志銘踢爆「祭旗」一詞其實係黑社會背語，彭志銘質疑攬住爵士名銜唔放嘅煲呔曾教壞細路。

彭志銘話「祭旗」呢個詞其實有段古，話說以前軍隊出征打仗前要拜天地，自不然會宰殺牲畜，令生靈塗炭，故此啲人就將呢個儀式稱為「祭旗」。呢個名詞輾轉流落到清朝，反清復明嘅天地會，就喺入會儀式中吟唱《祭旗令》，事關儀式中，會擺放一個插住五色令旗嘅斗。正因為天地會係地下組織，佢哋唔少習俗都成為黑社會習俗，「祭旗」一詞亦成為黑社會背語。

彭志銘心水好清，話煲呔曾唔係第一次使用黑社會背語，如佢早前佢批評人民力量議員黃毓民係「爛仔」，再早啲嘅「狗噏」雖唔係黑社會背語，但就粗鄙、唔適宜喺立法會講嘅粗口諧音，佢亂噏之後，立法會秘書又扯貓尾更改會議紀錄為鬥噏，實在係無恥教壞細路。彭志銘仲好慶咁問，○七年有家品店出咗一啲寫有類似三合會社團字樣嘅潮流T恤，警方隨即上門拉人，今次煲呔曾又再講黑社會背語，點解警方又唔做嘢，上禮賓府拉人呢？