政壇：人民力量擬圍壹傳媒

人民力量立法會議員黃毓民被指喺台灣打傷白鴿黨中常委馮煒光，馮尋日返抵香港，喺機場就有網民質疑佢扮嘢「插水」，同埋刻意調低相片光暗度詐傷等作出反擊。馮煒光信誓旦旦話，自己真係畀毓民打。

人民力量方面尋日繼續質疑馮煒光講大話，主席劉嘉鴻更計劃到壹傳媒位於將軍澳嘅總部示威，抗議《蘋果日報》尋日嘅頭版報道唔公平。到咗夜晚，人民力量又發表聲明話毓民冇打馮煒光，指控純屬捏造，更指《蘋果日報》有違傳媒道德，對其報道手法感到深惡痛絕。

講開《蘋果》呢篇頭版報道，早版嘅標題《醜陋的香港政客》竟然寫錯字，寫咗做《醜「陃」的香港政客》，唔見咗個「L」，到其後改版先至改番啱。我哋問咗幾位文字專家，佢哋全部都異口同聲話冇聽過呢個「陃」字，又話唔明白頭版頭條標題咁重要，點解連揀字咁簡單都可以揀錯，真正出醜嘅其實係《蘋果》。次文化堂社長彭志銘仲話今次錯得咁離譜，《蘋果》相關版面嘅校對、編輯等人全部都應該問責。