政壇：林公公完全冇腦

內地孕婦湧港產子令本港公私營醫療壓力倍增，政府同醫管局雖出招「落閘」，內地孕婦又改用衝閘方式挑戰醫療界底線，搞到港人都忍唔住發起反雙非孕婦來港產子嘅活動，正當唔少人氣憤特區政府太軟弱時，政務司司長林瑞麟又衰多嘴，話內地中產人士來港產子可以增加本港人口，好似同民意唱反調咁，曾經做過高官嘅新民黨主席葉劉淑儀尋日就點名鬧佢呢啲行為「完全冇政治智慧」。

點篩選內地中產？

葉劉淑儀尋日出席一個婦女組織嘅領袖培訓活動，講到做領袖要有嘅技巧時，佢認為講嘢好重要，可惜好多官員成日講錯嘢，自己製造問題。大家一聽葉太咁講，仲以為佢係咪暗寸經常講錯嘢、近日又引起好多爭論嘅特首參選人唐英年，點知，葉太今次嘅炮口原來係對住林公公。

引起葉太不滿嘅係，林公公早前指香港出生率低，內地中產家庭來港產子，可以為香港人口補充新血。曾任保安局局長嘅葉太好勞氣咁拋出幾個問題，香港政府點樣嚟篩選邊啲係中產家庭嘅孕婦呢？點樣知道人哋係咪來香港定居？甚至點樣控制嚟香港嘅人數都唔知，結果搞到市民都話要聲討林公公。葉太忍唔住話：「你話咁樣有冇政治智慧先？係完全冇囉！」

其實，葉太鬧得好啱，事關煲呔曾早前去北京述職時，都向中央面陳問題嘅嚴重性，要求阻截雙非孕婦衝閘，可見問題已經好嚴重，亦係香港難以承受嘅包袱，林公公卻公然同政府、同民意唱反調，唔係冇腦係乜嘢呢？