內地客搶食 奶粉也雙非

「雙非」學童、「雙非」孕婦，大家呢排聽到耳熟能詳，咁「雙非」奶粉聽過未？如果未聽過，大家好快就可以見識嘞。

呢，農曆新年將至，內地同胞爭相來港搶購奶粉，搞到奶粉供應短缺，就算有貨，學唐英年話齋價錢「貴到無倫」。奶粉鬧「雙非」，本地父母捱貴奶都算嘞，萬一搞到嗷嗷待哺嘅小寶寶斷奶，咁就大件事喇！

奶粉供應點樣緊張法呢？唔少市民投訴，近期買奶粉難過撲產房床位，跑勻多間藥房都空手而回。嗱，內地孕婦要出示分娩預約證明書，先至可以過關產子，而本地撲奶父母買奶粉，有啲居然要抱B同行，有B為證，藥房先至肯做生意，仲要限買兩罐，每罐貴咗十至廿蚊，你話究竟係乜嘢世界？

年關將至，基層市民除咗撲水過年，仲要撲奶度歲，都咪話唔辛酸。究竟乜嘢原因造成呢股斷奶潮呢？其實，同本港樓價被炒高、產房被逼爆、健康院被塞滿一樣，內地同胞蜂擁而來，奶粉供應愈來愈少，價格咪愈來愈高咯。

業界人士係咁講嘅，龍年效應等因素將令奶粉持續渴市，奶粉價格可能飆升，估計初生嬰兒專用嘅「1號」奶粉可能由每罐二百五十蚊加到三百蚊。李麗珊話喎，培養一個兒童要四百萬，睇嚟依家唔止咯！

即係咁，內地同香港唇齒相依，內地遊客更加係財神爺添，來港買奶粉本來好正常。尤其係內地結石奶粉名震中外，內地同胞爭相來港撲奶，根本係意料中事。不過咁，依家搞到奶粉缺貨，市場失序，就算撲奶成功，都要被迫買貴貨，咁就唔同講法嘞。

對住雙非孕婦問題，港府就話後知後覺、積重難返啫，雙非奶粉火頭剛現，冇理由唔諗計撲熄佢o架，係咪？正如有人建議，增加供應又好，開徵奶粉離境稅又好，甚至實施「港人港奶」政策又好，總之唔好再猶豫。嗱嗱嗱，咪話太一叮唔提醒港府，萬一真係搞到全港斷奶，大把父母搵你哋算帳！

奶粉危機再次畀大家睇到，香港係蕞爾小島，以有限資源應付十三億中國同胞嘅需求，根本吃不消，遲早爆大鑊嘅咋，一場尖沙咀名店禁攝風波激發中港矛盾，就係警號喇。如果港府繼續闊佬懶理，一係香港陸沉，一係斷奶斷糧，你哋揀邊樣，叮！