歐債危機令全球金融市場好唔穩定，金魚缸中人都話難搵食，名媛榮雪梅尋晚出席一個品牌活動時講到投資問題，佢都話暫時冚旗，被追問有否損失，佢坦言：「有少少啦，但睇得唔係好重，身體健康重要啲，夠食夠暖。」咁有冇損失過百萬呀？佢話：「最少啦！」
個市唔就，榮雪梅都疊埋心水，佢話︰「依家市道好差，休息吓唔投資住喇，多啲時間陪屋企人。」雖然損手過百萬元，睇佢心情就完全冇受影響，早前仲同老公及囝囝一家三口去咗日本札幌滑雪，輻射未驚過，可惜天氣太凍，搞到老公病咗。
榮雪梅透露投資損手過百萬元，但就冇千萬元咁多。
