政壇：搞搞政：鬍鬚曾閂水喉 派錢免問
今個財政年度嘅盈餘保守估計應該有五百億元以上，民間再有聲音要求政府派錢紓困。不過，鬍鬚曾就聞派錢怕怕，尋日出席一個活動時竟然採取三不政策，即係聽不到、不回應、最後咪不會派錢囉。
尋日有團體搞咗個「二○一一香港商界最關注的十件大事」評選頒獎典禮，全國政協委員朱蓮芬負責宣讀入選嘅十件大事，其中一項係政府派六千蚊，朱即時問台下嘅鬍鬚曾今年會唔會派呀？派七千、八千、九千定一萬呀？鬍鬚曾舊年補鑊至派錢，今年佢嘅態度又係咁龜縮。
到佢致詞時，大家都期望佢會唔會有兩句回應，但佢只係話舊年發生咗日本福島核事故、外圍經濟環境急劇變化等事件，香港一一克服困難，轉個彎都係想讚自己，對派錢嘅提問就提都唔提，擺到明撳實荷包。
（設計圖片及對白）