政壇：馮煒光毓民台灣爆衝突

台灣大選吸引各方政治勢力觀戰，不料本港政治人物去到台灣後，卻染上當地立法院肢體衝突之風。人民力量立法會議員黃毓民同白鴿黨中常委馮煒光一向唔妥對方，點知兩人都去咗台灣睇大選，仲狹路相逢爆衝突，馮煒光尋日就喺facebook聲稱畀毓民襲擊，仲打到眼鏡飛脫兼面腫腫添。

究竟發生乜事呢？先聽毓民個版本。佢話尋日下晝點幾鐘，雙方喺台北國民黨中央黨部狹路相逢，由於之前馮煒光喺fb發表一啲關於佢個仔嘅言論，所以佢上前質問對方，白鴿黨同行人士亦上前擋駕。毓民強調，自己最多係講粗口同手指指，絕冇打人，反而另外兩位人民力量義工就有受傷。

至於聲稱被襲嘅馮煒光就話，毓民去到國民黨總部門口，一見到白鴿黨黨員就問馮煒光喺邊，回頭見到佢即時揮拳相向，打到佢眼鏡飛脫，前後仲打咗佢兩次添。馮煒光強調已經向台灣警方備案，尋晚亦已經去咗驗傷，又話會要求國民黨提供閉路電視錄影帶作證喎。