政壇：碧樺依梁陳智明入婦委會
政府尋日宣布委任拔萃女書院校長劉靳麗娟做婦女事務委員會新主席，聽日正式生效，新班底仲有四個新面孔，包括喺特首選委會選舉中高票當選嘅社福界民主女神碧樺依，仲有港鐵事務經理梁陳智明。碧樺依係政界新鮮人，又係少數族裔，今次進身公職恐怕只係一個開始。
即將上任嘅新主席劉靳麗娟原來做過唔少公職，可以話係經驗豐富。佢除咗做過六年婦委會委員外，同時亦係大學教育資助委員會、社區體育事務委員會同廉政公署事宜投訴委員會嘅委員。前主席高靜芝早前卸任時，鬧爆政府忽略婦女政策，唔知新主席會唔會咁辣呢？
