政壇：德成局長話賭黃牌好新奇
民政事務局局長曾德成主管體育，但德成局長對足球博彩嘅認知就好貧乏。佢尋日出席立法會民政事務委員會時，講到早前香港同俄羅斯青年代表隊賽事，爆出有球員利誘打假波嘅醜聞時，德成局長話，當時佢喺現場，睇波睇得好緊張，期間甚至質疑球證向球員出示黃牌係咪合理。點解德成局長會覺得球證出示黃牌唔合理呢？原來佢當日至第一次聽聞非法賭波有一種玩法，就係可以賭球證幾時出黃牌喎！
其實賭球證幾時出黃牌呢個玩法，已經存在咗好一段時間，通常出現喺歐洲嘅大型聯賽，反而香港嘅非法賭波就好少咁玩法，所以市民唔知都唔出奇。不過，德成局長作為負責足球同賭博政策嘅局長，對於呢啲非法賭波玩法都一知半解，似乎有啲脫節喎。