政壇：林公公做毒廁導賞員

添馬艦新政府總部同立法會新大樓幾變退伍軍人症疫區，一眾司局長私人廁所更成為惡菌源頭，經過一輪大清洗之後，尋日煲呔曾喺新總部設宴招呼一眾立法會議員，但得一半人出席，唔知係咪猶有餘悸。啲議員都趁機參觀吓新總部，熱門景點之一竟然係高官嘅私人洗手間，政務司司長林公公全程充當私廁導賞員，佢同煲呔曾尋日分工合作，想唱好新總部，弊在效果都係得啖笑！

煲呔曾尋日設宴，亦算係新總部嘅入伙酒，唔少議員飯前先參觀大堂，跟住去商務及經濟發展局局長蘇錦樑嘅辦公室，入到去一聽見林公公指出私人廁所嘅位置，有議員即刻衝入去，懶理身後同事大嗌：「有菌喎！你仲入？」其他議員跟住亦入去左望右望。林公公全程好盡責，做晒導賞員分內嘅解說、伴遊工作。

呢個旅行團啱啱散band，煲呔曾就登場賣弄幽默，佢一邊好刻薄咁攞感染退伍軍人症桿菌嘅教育局局長「孫公」孫明揚嚟講笑，話佢成為第一個「祭旗」者，好彩孫公當時喺新總部盪失路遲咗到，否則真係嘔血都似。跟住煲呔曾連中央都玩埋，佢話自己聲沙沙同毒菌或退伍軍人症無關，只係因為早排上京述職、上海開會時冷親，講到呢度，佢仲懶醒咁話自己仲有五個半月先至「退伍」，可惜台下嘅人唧都唔笑。

煲呔曾憂廢柴班底被清洗

講講吓，煲呔曾又暴露驚死畀人炒嘅心態。佢話新總部爆出毒菌後有日朝早，望見報紙標題寫上「全面清洗政府總部」，心諗「唔係嘛，北大人咁快？我嘅任期仲有五個半月，全部掃晒？」後來睇清楚啲，原來係講緊清洗總部嘅水管同儲水庫，先至冇咁驚喎。原來，佢都知道自己同個班子表現差、有危機，一見清洗就驚到鼻哥窿冇肉！