粵港合作純吹水 內地孕婦繼續來

中國人一向相信命理之說，嗱，眼前就有兩個事例。一個係港府五勞七傷，毒菌纏身，有人話呢啲係夕陽政府衰敗凋殘嘅徵兆，真係唔到你唔信邪！至於另一個例子，就係「龍年效應」嘞。傳說生肖屬龍嘅小寶寶特別聰穎喎，信不信由你，反正內地同胞信了。所以咯喎，一直困擾港人嘅內地孕婦湧港產子巨潮，今年勢必浩浩蕩蕩，隨時決堤都有之！

嗱嗱嗱，內地龍寶寶趕住南下投胎，一定會同本地BB鬥搶床位，港府出招阻截內地大肚婆來港產子，形勢更加十萬火急。咦，啱嘞，粵港合作聯席會議喺香港舉行喎，唔通兩地政府終於肯急港人所急，趁內地龍寶寶大軍殺到之前合作「截龍」？大家知啦，港人有仔無位生，真係好冇陰功o架，粵港高官難得碰頭，港府無理由唔把握機會為港人出頭啫，吓話？

哈，衰得佢吖，港府就係話之你！兩地政府簽訂一大堆合作協議，水蛇春咁長，就係對港人最關注嘅內地孕婦問題隻字不提。內地大肚婆搶奪香港孕婦床位，既然港府唔嗲唔吊咯，廣東省政府就梗係關人個關啦，一句「依法處理」就塞住記者把口。

大家可能覺得奇怪，內地孕婦問題係粵港最迫切需要解決嘅問題，兩地政府擺埋一邊，不聞不問，唔通另有石破天驚嘅大事等住洽談？等太一叮睇吓先。兩地達成嘅協議原來有：今年內推出八達通同深圳「嶺南通」二合一卡；設十億元基金協助港企進軍內地；繼續推動兩地人民幣業務……太一叮怕再讀落去會產生綿羊效應，令大家大覺瞓，所以都係免嘞。

粵港高層勞師動眾開會，居然得出呢啲會議「成果」，講出嚟唔悶死人都笑死人啦。八達通咁瑣碎嘅事，仲係講咗Ｎ年添，至於協助港商升級轉型，更加係虛無縹緲，水分十足。

喂，各位港產官僚，香港人除咗望子成龍，亦都「望官成龍」，希望你哋集體退伍前能夠生生性性，為港人做番啲實事。點知你哋有內地孕婦炸彈唔去拆，只係一味裝點門面，胡混度日，咁點對得住供養你哋嘅納稅人呀？

不過話時話，唔講唔知，呢個粵港合作聯席會議已經係第十七次召開o架嘞，大家噏唔噏得出佢哋做過啲乜？噏唔出係正常o架，因為佢哋次次只係做官樣文章。以後改名「粵港吹水聯席會議」，咁就名正言順嘞，叮！