李家仁醫生嘅「小明」歌曲系列又有新作，佢尋日喺聖約翰救傷會嘅傳媒聚會上，着住件印有小明嘜頭嘅T恤，即席獻唱新曲《小明學救傷》，仲送出小明親筆簽名DVD畀大家拎走慢慢欣賞添！
本身係該會副總監嘅李家仁話「救人一命勝造七級浮屠」，想借呢首歌宣傳救傷訊息，等大家救人之餘又可自救。《小明學救傷》依舊由韋然填詞，內容叫大家學急救唔使驚青，搞到「頭又暈，手又震」，最緊要鎮定。
李家仁用歌聲教大家救傷嘅常識。
