政壇：舖租狂飆田二少撤出銅鑼灣
依家舖租勁升，老闆認真難捱，好似做成衣起家嘅新民黨副主席田北辰，本來喺銅鑼灣有五間分店，全部坐落人流極多嘅地段，但有分店最近敵唔過租金升幅，就算佢自願加租一半，業主都唔肯租，勢要佢讓位。
銅鑼灣啟超道嘅分店，田二少喺○六年已開始租，間舖月尾到期，最近業主問佢開到乜嘢價？佢好老實咁話依家月租一百一十萬元，最多出到天價一百五十萬元，點知有經紀話畀佢知，有化妝品舖願意出到二百萬元。不過，高處未算高，有金舖出到二百二十萬元，而肯出「天天價」嘅係錶舖，出到二百五十萬元。
田二少都慨嘆今次死而無怨，因為實在冇能力畀二百幾萬元租一個舖位，即係要搬啦！但佢又有所啟發，就係賣衫唔夠賣化妝品賺得多，化妝品又唔夠金舖好賺，而最賺錢就係錶行喎！
設計圖片及對白