政壇：陳啟宗呻難活化軍火庫
亞洲協會香港中心復修前英軍位於金鐘正義道嘅軍火庫逾十年，下月九號終於正式啟用，協會主席Ronnie陳啟宗更加會粉墨登場，連續兩日擔任星級導賞員，向入場嘅市民介紹軍火庫嘅特色同活化後嘅用途。
Ronnie話用咗成擔心機去搞個軍火庫，活化工作遠較想像中困難，因為嗰度原本爛溶溶，協會九九年接手後，原本都估計要用兩億元活化，協會揼咗馬會心口獲資助一億元，諗住可以蝕少啲，點知起起吓發現嗰度啲大樹有果蝠要保育，啲空調系統又要收收埋埋，以免影響建築物外觀，結果要掘個六米深嘅坑埋咗佢，最後不但遲咗完工，埋單更要成四億元，仲未計每年三、四千萬元嘅營運費。
陳啟宗話活化軍火庫遠較想像中困難。