政壇：議事規則改例想發言可撳掣

花咗成五十億元嘅添馬艦工程，好話唔好聽，由入伙到依家一直醜聞不斷，警察跌親、工人電死、偷工減料、鼠患蚊患、收唔到電話、惡菌出沒、妨礙採訪……總之集呢個夕陽政府缺點於一身。呢次只不過係再加多一樣，事緣用嚟開財務委員會或內務委員會嘅會議室一太大，依家要改議事規則，畀議員（手禁）掣發言。

長毛發難前車可鑑

上禮拜五嘅內務委員會會議上，內會主席劉健儀已經提過，因為會議室一太大，有陣時議員舉咗手想講嘢，佢或者秘書未必睇到，為免得失咗其他議員，所以佢決定更改議事規則。點解要更改議事規則？咪因為規則寫明議員想講嘢要舉手囉。唔單止內會呀，連財委會都改呀，一來財會同樣喺會議室一舉行，二來財會亦有規定，議員想講嘢就要舉手。

其實搬咗去立法會新大樓之後，都發生過唔止一次主席見唔到議員舉手，只係平時冇鬧出風波啫。平情而論，的確唔可以怪責劉健儀或財委會主席劉慧卿，事關會議室一真係好大，面積差不多等於以前舊立法會大樓嘅會議廳，加上喺主席位望番去啲議員座位，只會望見一片深啡色嘅海，若果議員又着番啲差唔多色嘅衫，真係同隱咗形冇乜分別。

話時話，冇出事就冇嘢咋，主席睇唔到議員舉手有時都幾大件事。好似舊年答問大會咁，社民連「長毛」梁國雄喺個位舉咗手表示有規程問題，但立法會主席睇唔到，當長毛犯規喺個位亂嗌，趕咗佢出場，結果引起軒然大波，都咪話唔麻煩。前車可鑑，睇嚟「雙劉」都係信唔過自己雙眼，穩陣啲好。