門常開變大毒樓 煲呔曾罪魁禍首

不怕退伍軍人症，至怕「退伍官人病」。冇錯，退軍症惡菌固然可怕，不過比起翹埋雙手等退伍收工嘅高官，可怕可惡程度簡直小巫見大巫。

呢，添馬艦政府總部變退軍症惡菌總部，搞到人心惶惶，換上一個有承擔嘅政府，梗係十萬火急搵出病源、揪出元兇，以防毒菌擴散害人啦。哈，點知夕陽政府等收工，部門之間官官相衞，我袒護你，你包庇我，只係一心賴皮到最後一分一秒。

之不過咁呀，港府對「疫情」輕描淡寫，唔代表真係冇事發生。先唔講公務員愁困大毒樓嘅公共衞生安全問題，五十億元政府總部居然變播毒中心，呢個都算係二○一二年第一個國際大笑話咯。

香港形象受損，「東方報業民意調查」顯示，五成四受訪者促當局徹查及追究原因，一成九直斥事件離譜，一成四形容大樓已成為惡菌溫床。

冇錯嘞，門常開居然真係門禁大開，被惡菌長驅直入，與其話係天災，不如話係人禍。

大家應該記得，煲呔曾好大喜功，為咗促成北大人南下剪綵呢場大龍鳳，再三迫令新總部趕工入伙。長官意志霸王硬上弓吖嘛，卒之咪搞到工程裙拉褲甩，甩甩漏漏，驗收程序又求求其其，後患無窮囉，叮！

市民嘅眼睛係雪亮嘅，上述民調顯示，三成五人狠批煲呔曾好大喜功，兩成四指摘佢為咗面子工程而不理公僕死活，兩成一直指佢要為事件負責。

即係咁，煲呔曾成日想名留青史，今次恨到嘞。豆腐渣總部開張之後，又漏水、又有老鼠橫行、又不停遇竊、又有警員從假天花墮地重傷，甚至有電器技工觸電身亡，醜聞不絕。煲呔曾，呢大筆帳你一定走唔甩。

出名為官渾噩嘅食物及衞生局局長周一嶽話喎，政府總部被惡菌入侵同趕工無關。如果佢唔係惡菌上腦導致精神錯亂，就係擦鞋心切搞到迷失理智，護主情急都唔使做到睜大眼講大話咁肉酸吖！

仲有呀，港府成惡菌溫床，煲呔曾係罪魁禍首，而特首參選人唐英年一樣走唔甩。新總部由興建到入伙，擔任港府大內總管嘅人就係唐唐，但係佢把關吊吊揈，咪搞到依家新總部家無寧日囉。香港亂象叢生，真係多得呢班人形惡菌唔少，叮！