喺區議會選舉元氣大傷嘅「丐幫」社民連二月改選，屆時將由立法會議員「長毛」梁國雄出任主席。雖然喺選舉大敗，加上財困傳聞不時傳出，可以話山窮水盡，但對立會選舉仍有雄心壯志，話要港九、新界五區都擺人出選。
打選戰就好似燒銀紙，究竟錢從何來？據聞佢哋想打破丐幫傳統，向會員收取月費，每個月一百蚊，計起一年就要千二蚊，未來都會搞幾次大型籌款，總之首要工作就係周圍撲水，否則好難搞得出乜嘢花臣。