政壇：劉吳惠蘭練氣功操Fit
夕陽政府風水唔好，搞到唔少高官都係高危病人，好似商務及經濟發展局前局長Rita劉吳惠蘭就患上腸癌，要辭官休養接受治療。不過，Rita已好得七七八八，繼早前喺馬場現身外，最近仲復出見朋友添！
一離開政府後即刻精神晒嘅，除咗Rita，仲有佢上手、前局長馬時亨。近期忙住要求政府重推中小企信貸保證嘅立法會議員林健鋒，就喺飯局上撞番當年主力推呢個政策嘅Rita，席上除有佢同肥亨外，仲有已退休嘅商務局前常秘蔡瑩璧。據林健鋒講，Rita精神好好，直頭好似冇病嗰陣咁神采飛揚，而佢嘅腸癌療程好快就完晒，狀態咁好，原來除咗信醫生，仲有練氣功同食中藥。
據聞席間有人八卦問Rita如果身體好番，會唔會出山幫下屆政府呢？Rita就話唔會喇，語氣都相當斬釘截鐵。
設計圖片及對白