政壇：陳繁昌60大壽彈結他
○九年上任科大校長嘅陳繁昌，曾經喺美國耶魯大學、加州大學洛杉磯分校擔任數學系教授，曾指導六十多位博士生同博士後研究員，可以話係桃李滿門，一班學生日前就特登幫佢搞咗個生日派對慶祝六十歲大壽，席間有來自世界各地近百名數學專家，當中唔少係數學界殿堂級學者，仲有港大校長徐立之同科大校董會主席張建東等。
陳校長一班老朋友，成晚細訴當年情，佢睇番舊相時仲感動到眼泛淚光。成晚高潮所在係陳校長首次粉墨登場，拎番幾十年前支結他，自彈自唱「My Way」等英文老歌。為答謝有朋自遠方來，佢特製咗百幾隻紀念杯送畀嘉賓，上面寫咗四條佢自創嘅公式，啲公式已被科學界廣泛採用。至於生日願望，佢就話希望科大有一日可以出產一個校友，好似蘋果創辦人喬布斯咁貢獻社會。
特製嘅紀念杯上刻咗由陳繁昌創立嘅數學算式，設計好特別。