政壇：鬍鬚曾守財奴性不改

被轟「守財奴」嘅財爺鬍鬚曾，舊年炮製咗「史上最廢」嘅財政預算案出嚟，惹起軒然大波，最後仲要跪低全民派六千蚊，但仍然平息唔到民憤，又被狂轟亂派錢，簡直財技拙劣。

鬍鬚曾慣用「狼來了」嘅政治伎倆，距離下個月佢公布任內最後一份預算案大半個月，尋日佢竟然夠膽又大吹淡風，喺網誌一方面話好彩香港堅決量入為出、嚴守財政紀律，多年嚟積累一定嘅儲備，又話見到其他先進經濟體，遇上困局時左支右絀，令佢更加警惕，定要堅守審慎理財嘅理財哲學。

基層幾時大吃大喝？

呢啲大道理，講出嚟冇人敢話佢錯，之不過，大家唔好唔記得佢以往係咁點香港市民，話審慎理財、量入為出，實則就係「應使唔使」，政府儲備愈嚟愈多，庫房水浸，但市民生活就愈嚟愈困苦，呢啲完全係鬍鬚曾嘅劣迹。

佢仲恐嚇大家，話政府的公共財政紀律不單係一個經濟問題，更係一個政治問題，需要政治手段解決，又話經濟體放棄量入為出原則，往往就難以回頭喎。唉，莫講話佢根本冇政治手腕處理政治問題，事實上係根本從來冇人話過，叫佢做大花筒喎，咁政府有大量盈餘，市民只係叫佢放水啫，而佢又喺度轉移視線，擺明係唔想開水喉，仲唔肯認自己係守財奴。

喺最尾佢仲話上一代人大吃大喝、下一代人被迫勒緊肚皮；上一代人開支無度、下一代就被迫受累。啱呀，講得好呀，但呢個唔切合香港現狀囉，依家香港問題，係呢一代好多人都半菽不飽，幾時得嚟大吃大喝呀？好心佢咪再混淆視聽啦！