試題九唔搭八 通識恐變通輸

另類通識題：白貓白色，黑貓黑色，病貓五顏六色，咁出貓乜嘢顏色？答案係：唔識。再問一題，邊個科目嘅試卷最九唔搭八，無論學生有冇出貓都唔識答？答案就係通識科。

冇錯喇，通識通識，通通唔識。係人都知，通識科用無字天書教學，課程空泛到如空中樓閣，評分更加毫無準則可言，搞到老師、學生無所適從，叫苦連天。唔好話出貓作弊嘅懶蟲學生鎩羽而歸，就算係晨操晚練學富五車嘅高材生，望住份試卷分分鐘一樣Ｏ晒嘴，唔知點答。唔信？睇睇考評局派發嘅中學文憑試練習卷吖！

練習卷分兩部分，卷一必答題有三條，限兩小時完成。作答時間咁短促，究竟係考學生嘅寫字速度，定係思考能力，呢樣都暫且不論，其中一條題目簡直無厘頭到極，要求考生解答「青少年在二○○六年可能曾面對甚麼挑戰」。喂，考生○六年時只係中一學生，點記得嗰陣時有甚麼挑戰吖？通識教育唔係主張獨立思考，摒棄死背爛記嘅咩？考評局出條咁嘅題目，同教學宗旨背道而馳，唔止強人所難，簡直九唔搭八！

即係咁，必答題變相鼓勵學生死記爛背，卷二選擇題更加窒息學生嘅獨立思考空間。嗱，特首參選人唐英年「車毀人亡」論膾炙人口，通識科試題亦有節錄喎，但就講啲唔講啲，淨係提到香港社會唔認同衝擊抗爭，問考生有幾認同呢個觀點。

嗱，教育界人士就批評得啱喇，唐唐官威咁大，學生作答時邊敢提反對意見呀？尤其港府出名官官相衞、偏私護短，好似新政府總部變退伍軍人症惡菌總部，各個部門都係你袒護我，我包庇你，學生挑戰唐唐，容乜易考試捧零蛋o架。大家知啦，通識教育最受詬病之一，就係評核毫無準則，學生肥佬都無仇報啦！

通識者，通達識理也，但現實剛好相反，通識科根本評核不公，目標不清，夾硬為搞而搞，最驚變學校、家長、學生通輸咋！

不如咁啦，通識科公開試試題應該咁問：「通識教育是否不倫不類，是否應該廢除？」相信唔止考生有大把嘢講，可能連評卷嘅老師都深有同感呀，叮！