政壇：陳啟宗唔做樓市生神仙
農曆年將至，明天更好基金一眾核心成員喺基金執行委員會主席Ronnie陳啟宗帶頭下，同市民拜早年。留職停薪出任特首參選人梁振英競選辦公室副主任嘅基金行政總裁Karen鄧淑德，唔避忌大方出席，但佢同Ronnie就全程封口唔提選舉話題，連樓價問題都以「你估我係神仙咩！」擋駕。
備受Ronnie盛讚嘅基金理事劉鳴煒，尋日未有現身，Ronnie擺明撐梁營，而劉鳴煒就投靠對手唐唐陣營，估唔到特首選舉令兩人各走各路。Ronnie好大方笑住話佢冇睇錯人，話劉係叻仔，仲話同劉再見亦是朋友喎！
現場仲有一位靚女新面孔，佢係家族生意專做禦寒手套嘅昌利行太子女林曉盈，被問到點解加入基金，佢笑稱：「可能佢哋需要工廠妹啩！」靚女真係識講笑，冇咁上下墨水及實力，點過到Ronnie嗰關？
陳啟宗同一眾基金核心成員同市民拜早年，鄧淑德（左一）亦有參與。
林曉盈隨身攜帶自家出品嘅皮手套，工作態度好認真。