政壇：郝鐵川留戀港英年代？
中聯辦宣傳文體部部長郝鐵川，早前炮轟港大民意研究計劃一項有關港人身份嘅民調唔邏輯、唔科學，事關市民表示自己係香港人，等於表示自己係中國人，言論令各界議論紛紛。不過，郝鐵川近日寄畀傳媒嘅賀年卡，竟用上英女王頭像郵票，究竟又係乜嘢邏輯呢？
我哋前排收到郝鐵川寄來嘅賀卡，赫然發現部分郵票用上港英年代嘅一元二角英女王頭郵票，呢啲郵票差不多自十五年前回歸後就失效，郵政署亦喺郵票上蓋上失效嘅印章。郝鐵川身為中聯辦一員，點解會私藏呢啲港英年代郵票成十幾年咁耐呢？私藏之餘仲要攞嚟用，用之餘仲要寄畀傳媒，真係耐人尋味。
不過，無論如何，既然佢不時都以一面正氣凜然嘅樣出來批評泛民主派，但自己又咁政治不正確，眷戀住殖民政府嘅遺物，呢啲係咪有口話人、冇口話自己呢？
郝鐵川寄給傳媒嘅賀年卡，部分郵票用上港英年代嘅英女王頭郵票（紅圈）。