政壇：婦委會險被煲呔曾摺埋
婦女事務委員會主席高靜芝做埋今個月就會卸任，臨別秋波，尋日同傳媒聚會時話最開心為個會定咗策略框架及出版《婦女發展目標》，為香港婦女權益定下長遠發展目標，唔使再靠「短視」嘅政府。講講下，佢都忍唔住狠批政府做嘢慢得過分，好似增加婦女喺諮委會嘅比例就足足等咗十年，真係好鬼激氣。
政府做嘢慢唔在講，最弊係唔肯撥資源。佢憶述○七年煲呔曾一度想將安老事務委員會、青年事務委員會同婦委會合併，組織一個高層次嘅家庭事務委員會，好彩當年各個地區嘅姊妹團體力撐頑抗，一日收幾封信叫政府唔好一意孤行，好彩煲呔曾做嘢一向「有頭無尾」，婦委會先可避過摺埋嘅一劫。