政壇：Eva傻強避惡菌

添馬艦新政府總部同立法會大樓被揭有十多處有退伍軍人症桿菌，變咗「大毒樓」，喺入面返工嘅三千幾名公務員人人自危，至少數十名議員助理日前亦聯署表達強烈不滿，但煲呔曾政府高官繼續愛理不理，先後託詞死撐事件同趕工入伙冇關係，但局長嘅行動就出賣咗自己，至少有三名局長高官決定輪流放假，疑似大難臨頭各自飛，佢哋早唔放假遲唔放假，話佢哋唔係避毒菌都冇人信喇！

政府憲報尋日公布，除咗之前已確診退伍軍人症桿菌、患有腎衰竭嘅教育局局長孫明揚休假，喺下周一返工外，仲發現喺退伍軍人症桿菌風波不斷升溫之際，多名局長高官輪流放假，首個係運輸及房屋局局長Eva鄭汝樺，今日起放到下周二；僅隨其後放假喺人稱「傻強」嘅財經事務及庫務局局長陳家強，由下周一開始連放六日。咁啱Eva同傻強嘅辦公室都有發現退伍軍人症桿菌。

隨時鬧出國際笑話

話時話，添馬艦建築群滿布退伍軍人症桿菌已成政治醜聞，如果以煲呔曾為首嘅夕陽政府高官，面對來勢洶洶嘅退伍軍人症桿菌淨係識繼續逃避同放假，添馬艦建築群成為「疫區」指日可待，到時鬧出國際大笑話時先決定補鑊，就真係太遲喇！