有殺錯冇放過 雞農望天打卦

香港今年怪事特別多。呢,淨係講食雞,前排冬至食無鮮雞,但嚟緊嘅新春佳節,市民可能獨沽一味食大肥雞,仲要係幾大幾肥都有嗰隻。

本港上月底發現有雞隻感染禽流感,當局如臨大敵,除咗大開殺戒滅雞萬幾,亦即時宣布停售活雞廿一日。開講有話,一利立,一弊生,喺禁售令之下,本港雞場已積存咗四十五萬隻適齡活雞,繼續禁落去,逼爆雞籠事小,適齡雞變超齡雞事大呀。

業內人士話,呢啲雞重三、四斤嘅有十幾萬隻,擔心當局解禁之後,雞隻又肥又老冇人吼。代表業界嘅立法會議員就指呢批雞到農曆新年都未必賣得晒,要求當局恢復賣雞後,暫停輸入內地活雞,畀本地雞場率先散貨。

話時話,禽流感威脅揮之不去,當局預防萬一,又殺雞,又禁售,寧緊勿鬆,本來無可厚非,市民亦會理解。不過咁,如果墨守成規,一成不變,唔識因應實際情況靈活變通,隨時可能弄巧反拙o架。

嗱,就講禁售活雞,失驚無神話唔賣得,雞農措手不及,都唔知點算好,殺雞就話有得賠啫,但禁售就關人個關,雞農被迫食自己,簡直冤哉枉也。一個雞場過萬隻雞,人工飼料樣樣唔少得,雞賣唔出不特止,而且愈大愈肥愈貶值,日日有出冇入,真係好傷o架!仲有呀,家陣本地已經出現「雞滿之患」,雞場愈來愈逼,必然影響衞生環境,間接製造惡菌溫床,分分鐘爆大鑊。

其實,港府對本地雞場有一整套安全防疫規定,喺監管疫情方面完全可以掌握主動,同輸入內地活雞缺乏監管唔同,兩種情況係咪應該分開處理呢?

好似今次咁,港府喺本地雞場兩次抽取樣本化驗,都未發現有雞隻感染禽流感,而長沙灣家禽市場執到嘅死雞,感染源頭喺邊當局到依家都講唔出。未查明真相就一刀切禁賣活雞,雖然話為咗防疫啫,但做法確係值得商榷,唔怪得本港雞農咁慶啦。

食衞局局長周一嶽話,如果禽流感風險冇擴散,下個禮拜會如期恢復賣活雞,亦會根據市場承受力同需要,適度放寬每日七千隻本地雞嘅限額喎。

北大人成日話,只要精神不滑坡,辦法總比困難多。計太一叮話齋,周一鑊與其一禁了之,不如多為本地雞農着想,因時制宜,適度調整擾民政策好過啦,叮!

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!