SUN世代：磨礪出鋒芒 肯捱起「傢」

曾家偉的生意路一直是靠自己，這個道理由童年開始學起。兒時學游水，他被推落泳池；學踩單車，又在斜路炒車。他於是學會游水和踩單車。長大後，他在生意路上歷盡風雨，捱過、跌過、痛過，但兒時經歷，提醒他遇到困難，總要想辦法掙扎求存，不應輕易放棄。曾家偉，一個永遠打不死的人，今天他已是六間軟體家具專門店的老闆。

父親做梳化起家，但曾家偉並非富二代，也不是一開始就做生意。童年住公屋，一家五口逼在百五呎單位，兒時玩意就是踢街場。讀完書，曾家偉走去做清潔工，令人難以置信。「嗰時冇諗咁多，咁啱朋友介紹，有工咪做囉！」初踏足社會或許注定要捱苦。「掃走廊、倒垃圾，連洗廁所都要做。」

之後他轉做建築廢料清潔，工作更辛苦。「記得有次，廣華醫院外牆翻新，要用鏹水抹乾淨外牆，嗰次真係好難受。」後來，他經同學介紹到土木工程實驗室工作。直到四年後，他的生意路才正式展開。「有一晚做完嘢好攰，返屋企見到阿爸，覺得佢仲辛苦過我。」

為減輕父親負擔，曾家偉決定繼承父業，經營梳化生意。但所謂繼承父業，其實又是靠自己。他在大埔開設一間梳化批發舖，自己兼埋員工一腳踢，「拎住公事包去勻全港十八區，逐間傢俬舖叩門。」一個落大雨的晚上，送來二百盒貨，曾家偉惟有冒住風雨，一個人拆貨，最後肺炎入院，「住咗七日院，瘦咗三十磅，差啲認唔到自己。」

為收480元陪捉成日棋

辛酸史又何止一段？○○年科網股爆破，經濟低迷，曾家偉不斷被人走數。有次，為收回一張四百八十元的定單支票，他跟傢俬舖老闆捉了一整天象棋。「佢話要等個運輸司機返嚟先有錢畀，我咪只好陪佢等。」之後天水圍一間傢俬舖突然倒閉，老闆走佬，「一夜之間冇咗十幾萬。」

但挫折沒令曾家偉洩氣，他反而視為是寶貴經驗。「呢啲經歷令我認清市場動向。」後來，大型連鎖店、百貨公司、直銷中心都成為他的客戶。○八年初，曾家偉突然決定壯士斷臂，轉做零售。「嗰時人民幣匯率變動好大，批發生意好難做。」於是他引入世界各地最好的軟體傢俬，建立自己的品牌，開設軟體家具專門店J.M.Soft，「有個名至有人識，做生意都一樣。」

今天，專門店已開至第六間，說到下一個目標，他希望每年開一間分店。其實那個推他落水、在斜路上放手、叫他在大埔開舖的人，就是曾家偉父親。是他，令曾家偉學會「捱係一種修行，挫折係成長最好嘅學習。」

曾家偉小檔案

現職：J.M.Soft創辦人

興趣：踢足球

婚姻狀況：已婚，育有一女