政壇：政商定格：施榮懷接任廠商會會長
中華廠商聯合會尋晚換屆，黃友嘉正式卸任會長，由副會長Irons施榮懷接棒。政商界猛人無懼寒流，逾八百嘉賓齊舉杯慶賀，情緒咁高漲，Irons都深受感染，致辭時忘形話：「今日外邊天氣好熱！」大家都知佢講笑，引嚟哄堂掌聲。
Irons上任後，預計忙足三年，事關由佢今屆起，會由兩年一屆任期，延長至三年一屆。廠商會今屆會董人數更係歷年之冠，由九十六人增至一百人，眾志成城，齊心搞旺商會。
外圍經濟波動，預計今年經濟下行風險大，唔少廠家都話好擔心，李錦記太子爺兼廠商會會董李惠中預測今年充斥不明朗因素，但佢相信有危亦有機，會努力做好家族生意，穩中求勝。
施榮懷（左二）獲家人同兄弟總動員出動打氣。
顏吳餘英（左）同林大輝（右）作為廠商會一分子，當然畀面撐場啦。