政壇：卿姐怕播毒拒政總飯局

「門常開」新政府總部變咗「大毒樓」，爆出退伍軍人症桿菌播毒危機，但煲呔曾並冇提高警覺，如期邀請立法會議員喺下禮拜五參觀新政府總部同喺裏面嘅餐廳食飯。立法會行政管理委員會成員劉慧卿似乎信唔過政府嘅消毒程序，尋日話已要求改番喺禮賓府食飯，依家等緊政府回覆，佢仲話行管會下禮拜二開會對「播毒」事件問責，定要徹查同追究責任。

其實，旅遊發展局主席田北俊尋日都話對事件感到驚訝，原來佢嘅辦公地點都有私人洗手間，但好彩係「唔知點解好多其他人使用」，令到水喉水嘅流動性都高啲，減低桿菌積存孳生嘅機會喎。講起新落成建築物都發現有退伍軍人症桿菌，呢個現象都考起田少呢位地產發展商，佢話以前工廠多用水塔就話會發現退伍軍人症桿菌啫，乜原來新落成嘅大廈因為冇清洗水缸都有可能積存退伍軍人症桿菌，真係未聽聞過。田少話有啲新落成嘅私樓擺幾年至發售，買家入伙時都未必會洗水缸啦！