政壇:搞搞政:棠哥言退聽住先

工聯會領導層每三年換屆,會內規定會長同理事長兩個高層職位,同一個人唔可以連續做多過三屆,嚟緊四月就會換屆。做咗兩屆會長嘅鄭耀棠尋日忽然話嚟緊四月好想退休,唔再續任,而理事會正物色接班人。

棠哥自稱因已六十三歲,加上曾因頸椎問題大病一場,所以今屆退落嚟嘅意欲相當強烈。在場記者聽完,仍然抱住懷疑態度,佢有見及此,即時話:「到四月睇過點囉!」

工聯會喺政壇影響力唔細,會員人數已突破三十六萬,要領導咁大嘅組織,真係少啲威望同能力都唔得。棠哥喺內地搭通晒天地線人所共知,但佢話同中央關係好,未必係做會長嘅必要條件,最緊要係心繫勞工。雖然佢好似去意已決,但亦留有後路,承認自己實際上未夠期,即使做多三年都冇違反內部規定喎。

所以話啫,棠哥話退休,大家都係聽住先,事關工聯會係老牌愛國愛港團體,中央肯唔肯放佢走都係未知數。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!