預算案切莫太廢 防中產繼續怒吼

財政司司長曾俊華上年一手炮製「史上最廢」預算案，搞到全城嗌打，上街高呼「鬍鬚曾落台」嘅人逼爆中環！話明史上最廢，上年預算案嘅廢柴程度可謂前無古人，不過係咪後無來者真係唔敢講，事關鬍鬚曾下個月會發表任內最後一份預算案，廢嘅程度隨時有過之而無不及o架！

所以咯喎，有市民就諗住喝醒鬍鬚曾，遊行要求預算案開倉紓解民困嘞。提到紓解民困，大家可能即時諗到低下階層。冇錯，港府嘅扶貧政策愈扶愈貧，基層生活愈嚟愈苦，呢樣毋須懷疑。之不過咁，今次上街怒吼嘅人，唔係基層，而係一向被視為沉默一群嘅中產階級。

咪睇中產人士斯斯文文，上街示威一樣火氣十足。十幾名中產聯盟代表分坐十二部私家車，由沙田大圍慢駛至新政府總部示威，狠批港府長期忽略中產，要求預算案接納多項建議，好似調高薪俸稅免稅額，同埋退差餉、退地租同退稅咁。港府「福為民開」塊招牌一向得個睇字，基層市民固之然苦不堪言，依家連中產階級都嗌頂唔順，逼到走上街頭抗爭，反映喺港府嘅無能管治之下，真係全民皆苦o架。

話時話，中產變「中慘」，夾喺上層同低層中間，交稅有份，福利無份，又真係幾慘o架。其他唔講吖，中產冇公屋住，但係私樓價格卻高與天齊，做房奴捱一世騾仔算好彩o架嘞，被迫「擠」身劏房、籠屋嘅大有人在，奏響一闋闋中產哀歌。

即係咁，中產表面風光、內裏陰乾，無計可施之下，自然想港府幫幫手啦，好正常啫。哈，點知預算案每次擠牙膏式派糖，鋪鋪都冇中產份，俗語有話啦，不患寡而患不均，中產唔反枱至奇！難怪次次預算案出台之後，都有中產話寧願做基層，起碼生活質素一定會好過依家。

最離譜嘅係，中產要供樓、供保險、供仔女讀書，仲要每月奉獻強積金供養班基金管理人，負擔夠晒沉重。但係「史上最廢」預算案居然仲向佢哋開刀，大加汽車首次登記稅，你話港府係咪無良吖！

嗱，鬍鬚曾，咪話太一叮唔提醒，中產係社會中流砥柱，若然呢碌柱冧咗，港府唔掂o架咋。唔該認真聽聽中產心聲，慎防佢哋繼續怒吼，你都唔想自己嘅廢柴財爺形象永留青史o架，叮！