政壇：民協派奇兵刀仔鋸大樹

早前都講過，民協要向外借多一票至搭夠十五個現任民選區議員提名，入場競逐明年立法會超級區議會議席。本來民協諗住由副主席譚國僑出戰，而KK馮檢基就繼續出戰九龍西直選，點知譚國僑輸咗區議會，如意算盤即刻打唔響。

之後黨內有人游說KK，叫佢試吓出戰超級議席，但據聞佢唔多願意，擔心未必贏到，九龍西嘅議席又冇人頂替，到時民協咪兩大皆空？所以下屆立法會都係留喺老巢穩陣得多。有人就提議不如由三十九歲、連贏四屆區議會選舉嘅副主席莫嘉嫻出戰超級議席。

有民協中常委表示，依家有意參選超級議席嘅泛民人士，清一色男性，就算建制派，亦只有工聯會票后「嫻姐」陳婉嫻係女性。莫嘉嫻雖然唔算美人胚子，但樣貌四正，所以民協內部唔少聲音都覺得，派「嫻妹」出戰，贏就令民協「翻生」，輸亦唔係大損失，更加影響唔到KK喺九龍西嘅選情，絕對係刀仔鋸大樹最佳示範喎！