政壇：鬍鬚曾留派錢後着

財爺鬍鬚曾舊年發表史上最廢嘅預算案，本來只肯注資強積金戶口，中產叫苦連天，後來喺各方反對下跪低，直接向市民每人派六千蚊。連派錢都可以派到全城憤怒，仲要畀人鬧佢企圖製造社會分化，嚟緊二月初佢發表任內最後一份預算案又會點呢？

即使鬍鬚曾舊年派錢派到一鑊泡，但大部分市民其實都希望政府可以繼續派錢，幫補吓大家應對通脹帶嚟嘅壓力。就連學友社尋日公布嘅舊年中學生十大新聞選舉結果，雖然派六千蚊只係排第六位，但已經係本地新聞入面排得最高。就連大部分未夠資格攞六千蚊嘅中學生都咁關心派錢事件，六千蚊對廣大市民嘅影響可想而知。

鬍鬚曾尋日出席民安隊慶祝活動時，被問到新一份預算案會唔會有措施幫助中產，佢只係笑笑口，乜都冇答到。再追問會唔會再派六千蚊，甚至加碼派多啲嘅時候，佢就叫大家耐心啲等吓喎。

賣地收入早逾全年目標

其實喺上年頭七個半月，政府嘅賣地收入已超過全年預測目標，庫房應該可以轉虧為盈。庫房長期水浸，現屆政府就到尾聲，再加上九月嘅立法會選舉如箭在弦，相信各大政黨都會逼政府喺新一份財政預算案內繼續加碼派錢紓困。

不過，有「估錯王」之稱嘅鬍鬚曾成日估錯庫房收支，淨係不斷重申佢嘅「應使則使」原則，前日仲繼續喺個人網誌對來年嘅經濟大吹淡風，似又係佢慣常用開嘅「狼來了」伎倆，用嚟壓低市民對新預算案派糖嘅期望。雖則係咁，但佢一來故作神秘，二來又唔敢講死唔再派錢，唔知又諗緊乜呢？